«Супер Марио Галактика» фильми учинчи ҳафта охирида ҳам бокс-офис чўққисини сақлаб қолди — 35 миллион доллар йиғиб, рейтинг бошида турибди. Universal ва Illumination тарафидан чиқарилган ушбу фильм аллақачон йилнинг энг кўп даромад келтирган фильмига айланди: мамлакат ичида 355,2 миллион доллар, дунё бўйлаб эса 747,5 миллион доллар йиғди. Шу суръатда давом этса, фильм яқин орада 1 миллиард доллар чегарасини ошиб ўтиши аниқ.
Amazon MGM Studios’нинг «Project Hail Mary» фильми ҳам бешинчи ҳафтасида яхши натижа кўрсатди — 20,5 миллион доллар йиғиб, иккинчи ўринни эгаллади. Бу илмий-фантастик саргузаштнинг мамлакат ичидаги умумий даромадини 285,1 миллион долларга олиб чиқди.
«Ли Крониннинг Мумиёси» дастлабки ҳафтасида 13,5 миллион доллар йиғиб, учинчи ўринга тушишга мажбур бўлди. Warner Bros. ва New Line томонидан чиқарилган ушбу фильмнинг бюджети атиги 22 миллион доллар эди. Жеймс Ван ва Джейсон Блум томонидан ишлаб чиқарилган фильм Кронининг 2023 йилдаги «Evil Dead Rise» фильми йиққан 150 миллион долларга яқинлаша олмайди.
Magnolia студиясининг «Normal» фильми эса дастлабки ҳафтасида 2,5 миллион доллар йиғиб, еттинчи ўринни эгаллади. Фильмда Боб Оденкирк маҳаллий банк таланишидан сўнг катта фитнага дуч келган кичик шаҳар шерифи ролини ўйнайди.
A24 студиясининг «Драма» фильми учинчи ҳафтасида 4,8 миллион доллар йиғиб, тўртинчи ўринни эгаллади. Зендая ва Роберт Паттинсон иштирокидаги ушбу инди фильм жами 39,7 миллион доллар йиғди. Айни пайтда бу икки юлдуз шу йил яна бирга «Дюна: Учинчи қисм» ва «Одиссея» фильмларида ҳам кўринади.
Бешинчи ўринни Universal студиясининг «You, Me & Tuscany» романтик комедияси эгаллади — икки ҳафтада 14,4 миллион доллар йиғди. Чекланган прокатда Focus Features’нинг «Lorne» документал фильми 415 кинотеатрда 270 000 доллар, A24’нинг «Mother Mary» фильми эса атиги бешта жойда 168 063 доллар йиғди.